Sedipualb@ plataformaren funtzioetako bat da udalen erabiltzaileek izapide berriak sartu ahal dituztela beren egoitza elektronikoan. Martxoaren 14an Iruñean egindako AUNA topaketan, Itziar Imazek, Garesko alkateak, azaldu zuen udal horrek egoitza elektronikoan izapide berria jarri zuela abian: udako igerilekuetarako abonamendua.

Alkateak azaldu zuenez, batzuetan herritarrek zailtasunak izaten dituzte udaletxera horrelako izapideak egitera joateko, eta aukera hibridoa eskaintzea erabaki zen, bai aurrez aurrekoa, bai bide telematikoa. “Hau egitera gehien bultzatu gintuena ziurtagiri digitalik eta cl@ve-rik behar ez zela izan zen —adierazi zuen—. Mezu elektroniko batekin soilik herritarrak izapide digitala egin zezaketen”.

Herritarrentzako erraztasunak

Herritarrek tramitea egitea oso erraza zen. Behin egoitza elektronikoan tramitea sortuta, Udalak webgunean eta sare sozialetan izen-emateen berri eman zuen (epeak, tasak, prozedurak, eskatzen den dokumentazioa). Albisteak egoitza elektronikorako esteka bat zekarren, tramitea egin ahal izateko.

Esteka horren bidez, ordainketa online egiteko prozedura azaltzen zuen orri batera sartzen zen pertsona: eskaera egin zezaketen pertsonak, epeak, zenbatekoak, deskontuak, salbuespenak…

Informatu ondoren, pertsonak “Instantzia berria” klikatu behar zuen online ordainketa egiteko eskaera hasteko, honela:

• Interesdunaren edo interesdunen datuak sartu (gehienez 5)
• Abonu-mota aukeratu
• Hala bazegokion, deskontu edo salbuespen baten onuradun zela egiaztatzeko beharrezko dokumentazioa entregatu
• Erabiltzaileak zenbatekoa kalkulatu eta banku-txartel edo bizum bidez ordaindu.

Barruan, webgunearen bidez egindako izen-emateek zuzenean Kontu-hartzailetzara bideratutako sarrerak sortu zituzten Udalaren erregistroan. Izapide horri buruzko espediente bat ireki zen, eta bertan dokumentazio guztia sartu zen (datuak eta entregatutako dokumentazioa). Bildutako datuak Excel batera esportatu ziren eta erabiltzaileek egindako egiaztapenak eta zenbatekoen kalkuluak egiaztatu ziren. Zuzenak ez baziren, jakinarazpena automatikoki egiten zitzaion interesdunari. Azkenik, Sedipualb@n jasotako datuak automatikoki Autolikidazioak aplikaziora eraman ziren, zegozkien ordainagiriak sortzeko.

Balorazio positiboa eta izapide berriak

Izapide berriaren balorazioa positiboa izan zen: “Oso ondo funtzionatu zuen barne-mailan, eta edozein berrikuntzak berezkoak dituen gorabehera txiki batzuk konpondu ziren. Herritarrei dagokienez, 80 inguruk eman zuten izena eta zalantzaren bat zuenak Udalera dei zezakeen zalantza hori argitzeko”.

Izapide hau ondo zebilenez, bigarren tramite errazago bat sortu zen herri-bazkari baterako txartelak erosteko. “Kasu honetan izapidea online bakarrik izan zen. Oraindik eten digitala dagoenez eta egoitza elektronikora sartzerik ez duten pertsonak badaudenez, Udala herritarren eskura jarri zen udal-bulegoetan izapidea online egiteko, hala eskatuz gero. Horrela, Udalean dirua erabiltzea saihestu zen”.

Eskuratutako esperientziarekin, Garesko Udalaren helburua ildo beretik jarraitzea da, beste bide batzuekin bateragarri eginda eta herritarrei izapidetze telematikoan lagunduta, beharrezkoa izanez gero.