Babestu zure nortasun digitala ziurtagiri digitalen erabileran jardunbide egokiak aplikatuz

Ziurtagiri digitala fitxategi informatiko bat da, ziurtapen-zerbitzuen emaile batek elektronikoki sinatua, eta beste erakunde batzuek eduki mota horretarako autoritatetzat jotzen dutena. Ziurtagiri digitalak sinadura egiaztatzeko datuak sinatzaile batekin lotzen ditu, sinatzaile horrek bakarrik sina dezan, bere nortasuna berretsiz.

Ziurtagiri digitalek titularraren benetako nortasuna sarean egiaztatzeko balio dute, hirugarrenekin (administrazio publikoekin, esaterako) edozein motatako izapideak egiten direnean. Oro har, hauek dira ziurtagiri batean aurki daitezkeen oinarrizko datuak: titularraren nortasuna, titularraren filiazio-datuak (enpresa, elkargo profesionala…), titularraren gako publikoa, ziurtagiriaren berezko datuak (serie-zenbakia, iraungitze-data…), ziurtagiria eman duen ziurtapen-agintaritzaren nortasuna eta ziurtapen-agintaritzaren sinadura.

Hainbat motatako ziurtagiriak daude, eta hainbat irizpideren arabera sailka daitezke: euskarriaren arabera (software-ziurtagiriak edo ziurtagiri zentralizatuak), jaulkipenaren arabera (ziurtagiri kualifikatuak edo kualifikatu gabeko ziurtagiriak), titulartasunaren arabera (pertsona fisikoaren ziurtagiriak, ordezkaritza-ziurtagiriak edo osagai-ziurtagiriak) eta eIDASen arabera (sinadura-ziurtagiriak, zigilu-ziurtagiriak, web-autentifikazioko ziurtagiriak edo kualifikatu gabeko ziurtagiriak).

Ziurtagirien eragiketak

Ziurtagiri digitalekin egiten diren eragiketa batzuk modu seguruan egin behar dira, datu pertsonalak eta transakzioen legezko baliozkotasuna babesteko. Ekintza horiek behar bezala egiten direla bermatzeko, ziurtagiri digitalak modu seguruan eta eraginkorrean kudeatzen eta erabiltzen lagunduko dizuten jardunbide egoki batzuk zerrendatuko dira jarraian.

• Ziurtagiriak lortzea: ziurtagiriaren hasiera ziurtagiri hori ematen den momentua izango da. Igorpen-prozesua aldatu egin daiteke emailearen arabera, baina kasu guztietan eIDASek babestutako ziurtapen-agintaritza bat hautatu behar duzu.
• Ziurtagirien instalazioa (inportazioa ere deitua): fitxategi batean emandako ziurtagirien kasuan, klik bikoitza egiten duzunean morroi bat exekutatuko da, ordenagailuan erabiliko dituzun ziurtagiriak inportatzeko. Ziurtagiriak hodeiaren biltegi berezietan gordetzeko aukera dago, Interneterako konexioa duten gailuetatik atzi daitezkeenak.
• Ziurtagirien esportazioa: Ziurtatu ziurtagiri digitala soilik behar-beharrezkoa denean eta segurtasun-neurri egokiak hartuta esportatzen duzula. Esportazioan, babestu fitxategia pasahitz sendo batekin eta ez gorde enkriptatu gabeko kokapen irisgarrietan, hala nola mahaigainean edo karpeta publikoetan. Ez partekatu inoiz posta elektronikoa edo mezularitza-zerbitzuak bezalako bitarteko ez-seguruak erabiliz. Gainera, ziurtatu ziurtagiria gailu seguru batetik bakarrik esportatzen duzula, malwarerik gabe, arriskuan ez jartzeko. Azkenik, gogoratu esportazioa baimendutako pertsonek bakarrik egin behar dutela, eta egin ondoren, ezabatu fitxategia modu seguruan, beharrezkoa ez bada.
• Ziurtagirien erabilera: Ziurtagiri digitala dokumentu pertsonala eta besterenezina da, horrek zuk (titularrak) soilik sinadura digitalak edo autentifikazioak egiteko erabili behar duzula esan nahi du. Zure ziurtagiria hirugarrenekin partekatzeak zure segurtasuna arriskuan jartzeaz gain, lege-ondorio larriak ere izan ditzake, zure ziurtagiriarekin egindako eragiketak zure erantzukizunpean hartuko baitira. Beste norbaitek erabiltzen badu, zure izenean egiten den iruzurrezko edo bidegabeko edozein jardueraren erantzuletzat hartu ahalko zaizu. Horregatik, funtsezkoa da zure ziurtagiria babestea eta zuk baino ez erabiltzea.

Ondorioz, ziurtagiri digitalen erabilera egokia funtsezkoa da transakzio elektronikoen segurtasuna eta baliozkotasuna bermatzeko. Funtsezko gomendioei jarraituz, hala nola zure ziurtagiria pasahitz sendoekin babestea, leku seguruetan gordetzea, partekatzea saihestea eta konfiantzazko gailuetan bakarrik erabiltzea, lotutako arriskuak minimizatu ahal izango dituzu. Gogoratu ziurtagiri horiek gaizki erabiltzeak zure informazio pertsonala arriskuan jartzeaz gain, legezko ondorio larriak ere izan ditzakeela. Ingurune digital seguruago bat ziurtatzeko, eduki beti jarrera zaintzailea eta arduratsua zure kudeaketekin.