Uda honetan, erabiltzaileen eta gidarien segurtasuna bermatzeko helburuarekin, larrialdietarako sistema bat ezarri da villavesetarako. Iruña Alert tresna berria San Fermin aurreko egunetan jarri zen martxan, eta larrialdietan ibilgailua geolokalizatzea eta Poliziak azkar esku hartzea ahalbidetzen du.

Gidariak botoia sakatzen duenean, alerta modu isilean aktibatuko da, Mankomunitatearen komunikazio-sistema propioaren bidez, eta sistema horrek autobusaren geo-posizionamendua eta dagokion linea identifikatuko ditu. Alerta Udaltzaingoaren Ekintzen Koordinatzeko Zentrora (EKZ) iristen da, eta autobusaren kokapena ikusteaz gain, gertakaria streaming bidez monitorizatu dezakete, ibilgailuaren barruko bideokamera sistemari esker. Horrek autobusera gertakariari erantzuteko behar adina patruila bidaltzea ahalbidetzen du. Eskualdeko zerbitzua denez, Iruñeko Udaltzaingoa inguruko polizia eta larrialdietako kidegoekin koordinatzen da.

Sistemaren ezarpenean Herritarren Segurtasun eta Bizikidetza Arloak parte hartu du Udaltzaingoaren EKZko arduradunekin, Iruñerriko Garraio Mankomunitatearekin, TCC garraio enpresarekin eta GOIL eta ANIMSA informatika enpresekin batera. Zehazki, ANIMSA irtenbidea udalaren teknologia- eta komunikazio-plataforman txertatzeaz arduratu da, elkarreragingarritasun eta funtzionamendu egokia ziurtatuz.

Villavesetako alerta botoia martxan jartzea urrian garraio publiko osoarentzat sortzen hasi zen proiektu zabalago baten parte da, taxiak barne. Taxi zerbitzuaren kasuan, Pamplona Alert aurretik jarri zen martxan, telefono mugikorraren bidez aktibatzen den sistema errazagoa delako. Taxiko profesionalek Android eta IOSerako eskuragarri dagoen Pamplona Alert aplikazioa deskarga dezakete, bere eta ibilgailuaren datuak eman, eta Udaltzaingoa da azken erregistroa baimentzen duena. Aplikazioa aktibatu ondoren, sistema aktibatzen badute EKZk identifikatu eta geolokalizatu ditzake.