Profil teknologikoko profesionalekin batera, ANIMSAko langileek era askotako zerbitzuak eskaintzen dituzte. Hori da, hain zuzen ere, Lan Harremanen Arloan integratuta dagoen Sail Juridikoa eta Kontratazioak arloaren kasua; Sail honen erantzukizuna, batez ere, erosketak, kontratazioak eta gai juridikoak eta sozietate-gaiak dira. Taldeko kideak Eva Montero, Koro Otamendi, Mª Puy Albistur eta María Sorbet dira.

Kontratazio-zerbitzu gisa, batetik, bezero diren erakundeekin enkarguak eta kontratuak izapidetzeaz arduratzen da, eta, bestetik, hornitzaileekiko kontratazioez.

Zehatzago esanda, 2025ean ANIMSAren bezero diren erakundeekin 88 enkargu eta kontratu berri formalizatu ziren zerbitzu informatikoak emateko, eta fakturazioa 9.387.786,69 eurokoa izan zen. Entitate akziodunek enkarguak egiten dizkiote ANIMSAri, lizitatu beharrik gabe; akziodunak ez diren bezeroekin, berriz, kontratuak sinatzen dira Kontratu Publikoei buruzko 2/2018 Foru Legeak ezartzen duena betez.

ANIMSAk bere bezero diren erakundeei eskaintzen dien zerbitzuetako bat informatika- eta inprimaketa-ekipamendua (ordenagailuak, inprimagailuak, etab.), software-lizentziak (ofimatika, birusen aurkakoak, etab.) eta kontsumigarriak (tonerra, kartutxoak) hornitzea da. Entitate bezeroek webaren bidez egiten dituzte hornidura informatikoen eskaerak; webgunea: Prestatu zure eskaintza da eta kontratazio-saila arduratzen da hornitzaileei egindako eskaerak izapidetzeaz.

Horrela ANIMSAk erosketa-zentral baten antzera jarduten du eta bere bezero diren erakundeen erosketa-beharrak biltzen ditu eskala-ekonomiak aprobetxatuz hornitzaileekin prezio eta baldintza hobeak negoziatzeko. Bezero guztientzat elkartuta erosterakoan lortzen den hornidura-bolumenagatik toki-erakundeek prezio lehiakorrean eros ditzakete hornidura informatikoak, toki-erakunde batek merkatuan banaka lor lezakeen prezioa baino prezio onuragarriagoan.

2025ean 1.003 eskaera egin zitzaizkien hornitzaileei, batez ere lizitazio bidez eta, kasu gehienetan, esparru-akordioetan eta erosketa-sistema dinamikoetan oinarritutako kontratuen bidez egindako esleipenen ondorioz. Prozedura hauek zerbitzu eta hornidura errepikarien kontratazio arina errazten dute, betiere kontratazio publikoaren printzipioak betez.

Nafarroako edozein toki-entitatek jaso ditzake eskala-ekonomia honen onurak, baina abantaila handienak akziodun direnek dituzte, Sozietateak ez baitie inolako tarterik jasanarazten erakunde akziodunei salmentan (erositako prezio berean saltzen du) eta, erosi ondoren, erakundearentzat inolako kosturik eragin gabe produktua instalatzeko eta konfiguratzeko laguntza teknikoa dutelako. Gainera, erakunde instrumental gisa enkarguak azkar egin ditzakete, lizitazio-prozedurak saihestuz.

Urteak aurrera joan ahala produktuen eta zerbitzuen fakturazioa handituz joan da, baina, batez ere, bilakaera prozesuetan gertatu da. Paperezko fakturatik PDF fakturara pasatu zen; 2015etik bezeroei modu elektronikoan fakturatzen zaie FACEren bidez, eta 2027an hornitzaileen fakturazioa ere elektronikoa izatea aurreikusten da; 2018tik kontratuak PLENA, Nafarroako Lizitazio Elektronikorako Plataformaren bidez egiten dira, duela gutxi 2.0 bertsioa estreinatu duena; eta Lege eta Kontratazio Saileko lantaldeak elkarlanean dihardu hodeian, Microsoft 365en bidez.

Sailak eskaintzen dituen Zerbitzu Juridikoen artean daude, besteak beste, Gerentziari eta Administrazio Kontseiluko Idazkaritzari laguntza juridikoa ematea dokumentazioa idatzi eta legeztatzeko eta sozietate-organoen, Administrazio Kontseiluaren eta Akziodunen Batzar Nagusiaren bilkurak prestatzeko, ANIMSA sozietate anonimoa delako. Pandemiaz geroztik saio hauek hala aurrez aurre nola telematikoki egiten dira, eta deialdiak egiteko eta dokumentazioa partekatzeko egoitza elektronikoa erabiltzen da.

Sailaren ardura da, halaber, 199 toki-erakunde akziodunek Batzarrean izango dituzten ordezkaritzen kudeaketa, bai eta aurreikuspenen arabera 2026an 200 bazkide baino gehiago izango diren akziodunen akzioen eskualdaketak eta liburuaren aldaketak izapidetzea ere.